Quiroga celebrou o Día do Libro cun espectáculo dirixido ao alumnado de infantil e primaria
Con motivo do Día do Libro, celebrado o pasado xoves 23 de abril, Quiroga acolleu a representación do espectáculo Viaxa cos Libros, a cargo da compañía Expresión Produccións, que tivo lugar na Casa da Cultura.
A actividade foi presentada polo alcalde de Quiroga, José Luis Rivera, quen deu a benvida á práctica totalidade do alumnado do CEIP de Quiroga, que asistiu á función. Viaxa cos Libros está dirixido ao público infantil e combina diferentes formatos como teatro, contacontos, monicreques, música e maxia, co obxectivo de fomentar o gusto pola lectura desde idades temperás. Trátase dunha proposta participativa na que o propio alumnado forma parte activa do desenvolvemento do espectáculo, nun formato dinámico e interactivo.
A iniciativa forma parte do programa Ler conta moito, impulsado pola Rede de Bibliotecas de Galicia, e foi organizada polo Concello de Quiroga en colaboración co CEIP da localidade.