Parada de Sil será sede dunha xornada formativa sobre o Banco de Terras e a lei de recuperación de terra agraria
O Concello de Parada de Sil será escenario, o vindeiro 27 de outubro, dunha xornada divulgativa sobre o Banco de Terras de Galicia e a Lei 11/2021, de recuperación da terra agraria, enmarcada no proxecto 'Move-Terra'. A actividade, aberta ao público en xeral, desenvolverase de 10.00 a 13.00 horas e está prevista para un grupo de entre 25 e 30 participantes.
O obxectivo principal do encontro é dar a coñecer os instrumentos recollidos na citada lei para favorecer a mobilización e recuperación de terras agrarias en Galicia, un territorio onde o abandono do campo constitúe unha problemática persistente. En concreto, porase o foco no funcionamento do Banco de Terras de Galicia e en como esta ferramenta facilita que as parcelas en desuso volvan poñerse en produción.
A sesión estruturarase en varios bloques. Tras unha apertura dedicada á recepción dos asistentes e a contextualizar a situación do abandono agrario, dedicarase un primeiro tramo a presentar a Lei de recuperación da terra agraria de Galicia, repasando o estado dos terreos agrícolas e forestais galegos e os distintos procedementos que contempla a normativa.
A continuación, entre as 10.35 e as 11.20 horas, abordarase en detalle o funcionamento do Banco de Terras: os seus obxectivos, a normativa que o regula e os pasos para incorporar ou arrendar fincas a través deste sistema. Tras unha pausa para o café, a xornada retomará a súa actividade cun bloque práctico de máis dunha hora de duración, centrado en explicar os procedementos administrativos para solicitar o arrendamento de parcelas: modelos a cumprimentar, prazos, documentación necesaria, criterios de puntuación e desempate, así como a forma de localizar fincas e consultar o estado dos expedientes.
O programa pecharase cun espazo de posta en común no que se repasarán as principais aprendizaxes e as dúbidas formuladas polos asistentes, ademais dos erros máis habituais á hora de tramitar as solicitudes. A xornada concluirá ás 13.00 horas cunha degustación de produtos locais e un espazo de networking entre os participantes.