Ourense afronta un martes de calor extrema: alerta vermella na montaña e aviso amarelo en Valdeorras
A provincia de Ourense enfróntase mañá martes a unha xornada de calor extrema. A Consellería de Sanidade confirmou que a zona de montaña de Ourense —que engloba concellos da Ribeira Sacra como Castro Caldelas, Parada de Sil ou A Pobra de Trives— entrará en nivel 3, alerta vermella, o grao máis alto do sistema de aviso por episodios de calor. Paralelamente, a comarca de Valdeorras mantense en nivel 1, alerta amarela.
A decisión responde aos datos achegados por Meteogalicia e Meteosalud, que anticipan a chegada de aire cálido procedente do sur da península. Isto traducirase en ceos despexados e un notable aumento térmico que, segundo as previsións, se prolongará polo menos ata o venres, con especial incidencia nas zonas de interior.
Ante este escenario, a Secretaría Xeral para o Deporte recomenda suspender a práctica de deporte federado entre as 13.00 horas e as 17.00 horas, agás no caso das actividades náuticas e acuáticas. Tamén se pide á organización das probas deportivas que adapte os horarios ás condicións de cada zona e reforce as medidas preventivas.
Sanidade lembra que as persoas maiores de 65 anos e os menores de 4 anos —especialmente os bebés de menos dun ano— son os colectivos con maior risco. Súmanse a esta lista as persoas con enfermidades cardiovasculares, diabetes, EPOC, insuficiencia renal, párkinson, alzheimer ou trastornos psiquiátricos, así como quen toma certos medicamentos (anticolinérxicos, diuréticos) ou consome alcol en exceso.
Tamén se consideran poboación de risco as persoas maiores que viven soas, quen reside en vivendas mal acondicionadas, as persoas con exceso de peso ou peso moi baixo, e traballadores ou deportistas que pasan longas horas ao aire libre.
A Consellería insiste en beber auga con frecuencia sen esperar a ter sede, evitar o alcol, o café e as bebidas moi azucradas, aumentar o consumo de froita e verdura, e optar por comidas lixeiras e máis frecuentes. Aconséllase tamén vestir con roupa lixeira e de cores claras, usar sombreiro e protección solar, permanecer en espazos frescos ou ventilados durante as horas centrais do día e non deixar nunca nenos ou persoas maiores dentro dun vehículo coas fiestras pechadas.
En caso de sufrir esgotamento ou un golpe de calor, Sanidade lembra que hai que solicitar axuda médica urxente chamando ao 061. Ademais, recomenda estar pendentes de familiares ou veciños que vivan sos durante estes días de máximo risco.