Os centros educativos de Monforte desfrutan de xogos interactivos co gallo do 25N
Dende o pasado luns 21, o Concello de Monforte ven de poñer en marcha varias actividades que a través da Concellería de Muller e Igualdade e o CIM, ideáronse para os centros educativos de primaria e secundaria de Monforte co gallo do 25 de Novembro, Día Internacional da Eliminación da Violencia contra as Mulleres.
Dende a Concellería de Muller e Igualdade, sendo coñecedores de que para poder evitar a violencia de xénero é necesario fomentar e inculcar a educación no respecto así coma na igualdade de xénero, e que o traballo en idades temperás con mozos e mozas é a mellor opción para conseguir un progreso rápido e sostido no que respecta á súa prevención e erradicación, póñense en marcha tódolos anos actuacións cara o ámbito educativo.
Este ano nos centros educativos as actividades desenvoltas son xogos interactivos e unha proba de escapismo.
O xogo interactivo O Caso 25N vai dirixido ó alumnado de 6º de educación primaria. A actividade que consiste nun xogo de investigación interactivo dirixido a poboación xuvenil, no que o alumnado participante ten que, por equipos, descubrir como a socialización diferencial interfire nas relacións humanas, podendo asentar as bases de condutas non igualitarias que favorezan actitudes e situacións de violencia. Para acadar o obxectivo do xogo o alumnado terá que usar o razoamento crítico e a lóxica no escrutinio de diferentes situacións, documentos ou elementos que se atoparán no transcurso da actividade.
A actuación é levada a cabo pola empresa Afouta S. Coop. Galega, a cargo de Sonia Fernández Bertólez e Ester Cano González, profesionais do Traballo Social con especialización en xénero e igualdade e con experiencia en xestión de grupos, que empregarán unha estratexia de traballo participativa e baseada na adquisición conxunta de coñecementos e no adestramento de habilidades, co manexo das ferramentas e técnicas axeitadas e facilitadoras da posta en común de opinións, debates... para que o alumnado participante interiorice os contidos dun xeito dinámico, participativo e auto reflexivo.
A distribución das sesións será a seguinte: hoxe xoves 24 novembro estarán no CPR PP. Escolapios en horario de 9.20 a 11.20 horas para os alumnos de 6ºA e de 11.30 a 13.30 para os de 6ºB e o luns 28 novembro no CEIP A Gándara de 10.05 a 12:05 e no CEE Infanta Elena de 10.05 a 12.05 horas.
Por outra banda, a proba de escapismo Reixeita o maltrato vai dirixido ó alumnado de 3º de ESO.
A persoa encargada de levar a cabo esta actuación é Simón González Villanueva da empresa Territorio Comanche que traballará dunha maneira lúdica contidos relacionados coa violencia de xénero (a orixe da cor violeta, as irmáns Mirabal, os celos, a violencia de xénero na arte, ciber acoso, sexting, ciber dating...).
A actividade vai dirixida ao alumnado de 3º da ESO e cada sesión terá unha duración de 100 minutos.
Para levar a cabo o mesmo, o alumnado distribúese por equipos e conta cunha caixa forte, un criptex e fichas de traballo. Desenvólvese en catro partes: unha charla técnica de 15 minutos, unha proba de escapismo de unha hora e unha rolda de preguntas de 15 minutos.
Durante esta proba, a gravación con voz en off que se escoita ao longo de toda o obradoiro aporta información de interese sobre as nosas protagonistas. Nesta fase, os equipos enfróntanse a unha rolda de preguntas para reforzar os contidos traballados durante a proba de escapismo.
Os dous equipos con maior puntuación nas dúas fases anteriores enfróntanse a unha emocionante proba final denominada A Pirámide.
As sesións que faltan por desenvolverse terán lugar hoxe no CPR Ferroviario en horario de 9.00 a 10.40 h e no CPR Fundación Torre de Lemos de 11.45 a 13.25 horas.
