O’Mega convoca concentracións en varios hospitais galegos durante a folga médica da vindeira semana
A organización O’Mega anunciou un calendario de concentracións en distintas localidades galegas con motivo da folga de médicos e facultativos convocada entre os días 18 e 22 de maio. A mobilización ten como principal reivindicación a creación dun estatuto marco propio para o colectivo sanitario por parte do Ministerio de Sanidade.
As concentracións celebraranse ás 11.00 horas diante das portas principais dos centros hospitalarios participantes. O luns 18 de maio a protesta terá lugar no Hospital Álvaro Cunqueiro de Vigo. O martes 19 están previstas mobilizacións no Hospital Universitario de Ourense, no Hospital Comarcal de Monforte, no Hospital Provincial de Pontevedra e no Hospital Comarcal do Salnés.
O mércores 20 de maio a concentración desenvolverase no Hospital Universitario Lucus Augusti (HULA) de Lugo, mentres que o xoves 21 será no Hospital de Montecelo. Finalmente, o venres 22 de maio a convocatoria rematará no Hospital Universitario da Coruña.
Desde O’Mega sinalan que estas accións buscan visibilizar o malestar do colectivo médico e reclamar unhas condicións laborais e profesionais adaptadas ás particularidades da profesión sanitaria.