O Xeoparque Montañas do Courel organiza en Ribas de Sil unhas xornadas de fotografía dentro do seu programa de outono
O Xeoparque Montañas do Courel incluíu no seu programa de outono, o Outono Xeolóxico, unhas xornadas de fotografía centradas na paisaxe da comarca, que terán como sede principal o concello de Ribas de Sil. A cita desenvolverase ao longo dunha fin de semana de novembro, con sesións repartidas entre o sábado e o domingo.
A actividade comezará o sábado ás 10.00 horas coa recepción dos participantes e a presentación do programa, nun acto que terá lugar na Casa do Concello de Ribas de Sil. A seguir, entre as 10.30 e as 12.30 horas, impartirase unha charla sobre a obra fotográfica de Felipe Castro.
Pola tarde, de 13.00 a 20.00 horas, está prevista unha saída de campo en autobús para que as persoas asistentes poidan poñer en práctica as técnicas fotográficas directamente sobre o terreo. Durante o desprazamento, cada participante deberá encargarse de levar a súa propia comida.
Xa o domingo, a mañá quedará libre até as 12.30 horas para que os inscritos poidan seguir fotografando pola zona ou aproveitar para visitar algún punto de interese próximo, como o Museo Xeolóxico de Quiroga, que ese día abrirá en horario de 11.00 a 12.00 horas.
A xornada, e con ela a actividade, pecharase coa presentación dos resultados obtidos e a entrega de premios, de novo na Casa do Concello de Ribas de Sil, ás 12.30 horas. O encontro rematará cun pequeno petisco de despedida ás 13.00 horas.
Dende a organización lembran que é obrigatorio anotarse previamente para poder participar, a través dun formulario habilitado para tal fin, e animan a quen teña interese na fotografía de natureza a apuntarse para descubrir a contorna do Courel coa cámara na man.