O Viveiro Os Trollos de Bóveda abre ao público con visitas ata o 22 de outubro
O Viveiro Os Trollos, situado no concello de Bóveda, abre as súas instalacións ao público tanto para visitas por libre como para visitas guiadas, nun programa de acceso que estará vixente ata o 22 de outubro.
As visitas sen guía poderán realizarse todos os días da semana en horario de 10:00 a 20:00 horas. Para aquelas persoas que desexen participar en visitas guiadas, será necesario solicitar cita previa de forma provisional chamando ao número do propio viveiro (982 29 44 04).
Segundo se indica, a Consellería do Medio Rural habilitará nos vindeiros días unha plataforma web para facilitar a reserva destes percorridos.
No caso das visitas guiadas, establécense diferentes franxas horarias. Pola mañá haberá dous turnos, de 10:15 a 11:45 horas e de 12:00 a 13:45 horas, mentres que pola tarde os horarios serán de 17:00 a 18:30 horas e de 18:30 a 20:00 horas.
Durante as visitas, o público poderá percorrer a nova senda interpretativa do viveiro, que incorpora pezas de madeira representativas da fauna da contorna, co obxectivo de facilitar a observación e comprensión do hábitat formado polas distintas especies forestais presentes no espazo.