O Viveiro dos Trollos supera as 1.500 visitas durante o verán
O Viveiro dos Trollos, en Bóveda, rexistrou máis de 1.500 visitas ao longo deste verán, unha cifra que o Concello considera un resultado destacado para este espazo forestal. O alcalde, José Manuel Arias, sinalou que a resposta do público foi “todo un éxito que nos sorprendeu a todos”.
O viveiro continuará aberto ao público ata o 22 de outubro, de martes a sábado. Ademais, as visitas sen guía poderán realizarse todos os días da semana, entre as 10.00 e as 20.00 horas.
Para as visitas guiadas establécense catro quendas. Pola mañá serán de 10.15 a 11.45 horas e de 12.00 a 13.45 horas, mentres que pola tarde haberá dous horarios, de 17.00 a 18.30 horas e de 18.30 a 20.00 horas.
Durante o percorrido, as persoas visitantes poden coñecer a nova senda interpretativa do viveiro, na que se incorporaron pezas de madeira que representan diferentes especies da fauna da contorna. A proposta está deseñada para facilitar a observación do espazo e comprender mellor o hábitat asociado ás distintas especies forestais presentes no viveiro.
O Viveiro dos Trollos é un dos oito centros forestais dependentes da Consellería do Medio Rural. Na actualidade, as súas instalacións producen arredor de 20.000 plantas de frondosas autóctonas.
A actividade do centro inclúe tamén actuacións relacionadas coa mellora das infraestruturas destinadas á produción forestal, así como a conservación de hortos e sementeiros e a obtención de sementes con alto valor xenético.