O Torneo Ping Pong Pantón celebrará a súa cuarta edición do 28 ao 31 de xullo
O Torneo Ping Pong Pantón regresará este verán cunha nova edición que se desenvolverá os días 28, 29, 30 e 31 de xullo, a partir das 20.00 horas, na praza do Concello de Pantón. A iniciativa, impulsada por un grupo de amigos do municipio, celebra xa a súa cuarta edición co obxectivo de ofrecer unha proposta deportiva e de lecer para veciños e visitantes.
A competición está aberta a persoas de todas as idades e niveis, desde quen se inicia neste deporte ata xogadores con maior experiencia. A organización destaca que o torneo pretende ser un espazo inclusivo no que tanto quen busca competir como quen simplemente desexa pasar un bo rato con amigos poida atopar o seu lugar.
Ademais do aspecto deportivo, o evento pretende contribuír á dinamización da vida social do municipio durante o verán e favorecer o ambiente na hostalería local, converténdose nun punto de encontro para participantes e público.
A edición do pasado ano reuniu a máis de cincuenta xogadores ao longo de catro xornadas, nas que se disputaron preto de 160 partidos entre as modalidades individual e por parellas. Para este ano, a organización confía en superar esas cifras de participación.