O Servizo de Atención Temperá de Quiroga organiza este xoves unha xornada de portas abertas
O Servizo de Atención Temperá de Quiroga celebrará este xoves 25 de xuño unha xornada de portas abertas nas instalacións do edificio da Ribeira, co obxectivo de favorecer o encontro entre usuarios, familias e profesionais que forman parte deste recurso.
O servizo está integrado pola agrupación dos concellos de Quiroga, Folgoso do Courel, Ribas de Sil, A Pobra do Brollón, Bóveda, O Saviñao, Pantón e Sober, e presta atención cada ano a máis dun cento de nenos e nenas.
A súa actividade está dirixida a menores de entre 0 e 6 anos en situación de vulnerabilidade evolutiva, así como ás súas familias e contorna, co propósito de ofrecer unha resposta temperá ás necesidades e dificultades que poidan presentar.
Entre os servizos que se prestan inclúense atención psicolóxica, logopedia e terapia ocupacional, desenvolvidas de maneira individualizada, con proximidade e mantendo contacto permanente coa contorna do menor para favorecer unha intervención adaptada ás súas necesidades.