O PSdeG-PSOE abre a súa campaña electoral en Monforte cun acto na rúa Cardeal
O PSdeG-PSOE de Monforte de Lemos puxo en marcha esta fin de semana a súa campaña electoral cun acto celebrado na céntrica rúa Cardeal, que xuntou a un número destacado de militantes e simpatizantes malia que durante a noite anterior se rexistraran chuvias na localidade.
Ao encontro acudiu o candidato ao Senado pola formación, Roberto Castro, quen se sumou á tradicional pegada de carteis xunto aos asistentes. Castro estivo acompañado polo alcalde de Monforte, José Tomé, así como por outros integrantes do equipo de goberno municipal: a tenente de alcalde, Gloria Prada, e os concelleiros José Luis Losada, Marina Doutón, José Manuel Mougán, Regina López e Miguel Tomé.
O acto serviu como pistoletazo de saída da actividade electoral que o PSdeG-PSOE desenvolverá nos vindeiros días tanto na cidade como en toda a comarca. Segundo trasladou a propia formación, o arranque de campaña estivo marcado polo entusiasmo e a implicación dos presentes, que amosaron a súa intención de afrontar este período electoral con forza, ilusión e espírito participativo.