O PP de Monforte de Lemos pide revisar as tubaxes da rúa Calvo Sotelo tras varios cortes de auga na rúa recén asfaltada
O Grupo Municipal do Partido Popular en Monforte de Lemos trasladou este venres a súa preocupación polos problemas que, segundo indica, se veñen repetindo no abastecemento de auga do municipio, centrando a súa intervención no caso da rúa Calvo Sotelo.
A voceira municipal popular, Katy Varela, explicou que os veciños desta vía sufriron tres cortes de auga nos últimos quince días, unha circunstancia que, na súa opinión, pon de manifesto a necesidade de revisar o estado das condutas.
Dende a formación consideran que as actuacións de repavimentado deberían ir acompañadas dunha revisión previa das tubaxes de abastecemento que pasan por baixo do asfalto, ante a posibilidade de que volvan producirse avarías nesa zona. Varela advertiu de que, de ocorrer isto, sería necesario levantar de novo o pavimento para reparar as condutas, o que implicaría repetir a obra de asfaltado.
O PP de Monforte propón así que as intervencións na rede de auga se aborden con carácter previo aos traballos de asfaltado, como forma de optimizar os investimentos municipais en vía pública.