O PP de Lugo leva ao Parlamento Europeo as demandas da provincia en materia de infraestruturas
Os deputados do Grupo Provincial Popular trasladaron ao Parlamento Europeo a súa preocupación pola falta de infraestruturas de comunicación na provincia de Lugo e polas consecuencias que esta situación ten para a conectividade, a competitividade empresarial e o desenvolvemento económico e social do territorio.
O voceiro provincial do PP, Antonio Ameijide, reclamou o apoio das institucións europeas para que Lugo deixe de quedar á marxe das principais redes de transporte e mobilidade. Segundo os populares, a provincia continúa excluída de planificacións estratéxicas como o Corredor Atlántico de Mercadorías e carece de conexións ferroviarias e por estrada adecuadas ás necesidades da cidadanía e das empresas.
Un dos principais motivos de preocupación da formación é a exclusión de Lugo da planificación do Corredor Atlántico para o horizonte de 2030. Os deputados populares consideran que quedar fóra desta rede europea pode dificultar o transporte de mercadorías, a captación de investimentos e a capacidade das empresas lucenses para competir en igualdade de condicións con outros territorios.
Ameijide tamén denunciou as carencias da conexión ferroviaria da provincia, que continúa sen alta velocidade. Ademais, criticou a falta de avances nas variantes de Os Peares-Canabal e Rubián, actuacións que considera necesarias para reducir os tempos de viaxe e mellorar as prestacións da liña entre Ourense e Lugo. Os populares sinalaron tamén a ausencia de conexións ferroviarias coas provincias limítrofes como outro dos obstáculos para a mobilidade.
No ámbito das comunicacións aéreas, o voceiro provincial referiuse ás dificultades para viaxar a Bruxelas, destino para o que, segundo indicou, anteriormente existía unha conexión directa e agora é necesario facer escala en Barcelona.
En materia viaria, o PP reclamou máis investimentos para completar as autovías pendentes, entre elas a A-54, que conectará Lugo con Santiago; a A-56, entre Lugo e Ourense; a A-74, coñecida como autovía da Mariña; e a A-76, que permitirá unir Ponferrada, Monforte e Ourense. A formación tamén pediu mellorar a conservación das estradas existentes para garantir a seguridade viaria e unhas comunicacións adecuadas.
Os deputados populares sosteñen que estas carencias limitan as posibilidades de desenvolvemento dos concellos, especialmente dos máis pequenos, e dificultan tanto os desprazamentos da poboación como a actividade das empresas. Por iso, solicitaron que as necesidades da provincia sexan tidas en conta na planificación estatal e europea, cun calendario de actuacións e investimentos que permita mellorar a súa conexión cos principais mercados e centros económicos.
Ameijide concluíu reclamando que Lugo deixe de ocupar unha posición secundaria na planificación das infraestruturas e que se impulsen as actuacións necesarias para reforzar a súa competitividade e o seu desenvolvemento.
O PP de Pol leva ao Parlamento o mantemento do CEIP Rosalía de Castro
A voceira do PP de Pol e deputada autonómica, Nicole Grueira, trasladou ao Parlamento de Galicia as deficiencias de mantemento do CEIP Rosalía de Castro, en Mosteiro, que atribúe ao incumprimento das obrigas municipais. A popular denuncia a falta de limpeza, reparacións pendentes e a ausencia de conserxe por terceiro ano consecutivo. Segundo afirma, as iniciativas que presentou no Pleno municipal non chegaron a debaterse nin votarse. Grueira reclama que o Concello garanta o mantemento das instalacións, a cobertura do servizo de conserxería e o cumprimento das obrigas económicas correspondentes.