O PP da Pobra do Brollón reclama máis médicos para o municipio e pide ao Goberno central solucións ao déficit sanitario
O voceiro do PP na Pobra do Brollón, Teddy López, participará este venres na concentración convocada no municipio para reivindicar unha mellor atención sanitaria, reafirmando así o apoio do seu partido á defensa dunha sanidade pública de calidade.
López sinalou que comprende a preocupación mostrada pola veciñanza e explicou que, aínda que se traballa para garantir a presenza dun facultativo na localidade, isto non foi posible pola falta de profesionais dispoñibles. Segundo destacou, trátase dunha circunstancia que non afecta unicamente a este municipio, senón ao conxunto do sistema sanitario español.
Nesa liña, o representante popular apuntou que desde a área sanitaria de Lugo, A Mariña e Monforte de Lemos se traballa para que os recursos existentes permitan atender ao conxunto da poboación, priorizando a asistencia en función das necesidades e dos medios dispoñibles, nun contexto marcado pola escaseza de especialistas en medicina familiar e comunitaria.
Teddy López insistiu en que este problema responde a unha causa estrutural que, ao seu xuízo, o Goberno de España non resolveu. Afirmou que desde o seu partido levan anos alertando sobre a falta de planificación na formación e reposición de profesionais sanitarios, en particular en medicina familiar e comunitaria, e que continúan sen apreciarse medidas eficaces por parte do Executivo de Pedro Sánchez para facer fronte a unha situación que, segundo subliñou, afecta a todas as comunidades autónomas.
O voceiro popular considerou lexítimo que a veciñanza se mobilice para esixir unha mellor asistencia sanitaria, aínda que lamentou que o alcalde do municipio, do BNG, centre as súas críticas exclusivamente na Xunta de Galicia e evite, segundo dixo, esixir responsabilidades ao Goberno central, ao que a súa formación política apoia no Congreso dos Deputados.
López sostivo que, se o obxectivo real fose defender a sanidade pública, tamén se reclamarían solucións a quen ten competencia para aumentar o número de profesionais e planificar a formación de novos médicos. Ao seu parecer, non se pode utilizar a inquietude veciñal para facer oposición á Xunta mentres se garda silencio ante a que considera inacción do Goberno central.
O voceiro do PP reiterou que o seu partido seguirá defendendo os intereses da veciñanza e apoiando aquelas reivindicacións que contribúan a mellorar a atención sanitaria, ao tempo que reclamou ao Executivo central a adopción de medidas urxentes para poñer fin á escaseza de médicos que, segundo sinalou, padecen tanto Galicia como o conxunto de España.