O GDR Sil-Bibei-Navea organiza un obradoiro de elaboración de pomadas e bálsamos con plantas locais en Chandrexa de Queixa
O Concello de Chandrexa de Queixa acollerá o próximo 20 de xullo un obradoiro centrado na elaboración de pomadas e bálsamos medicinais a partir de plantas da contorna.
A actividade desenvolverase nas instalacións do colexio de Celeiros e permitirá ás persoas participantes achegarse ao coñecemento e uso tradicional das plantas locais para a elaboración de preparados naturais.
O número de prazas estará limitado a un máximo de 15 participantes, polo que será necesario formalizar a inscrición antes do día 10 de xullo.
As persoas interesadas poderán realizar a súa inscrición a través do Concello de Chandrexa de Queixa ou mediante o contacto facilitado por Piel Natura.
A actividade será gratuíta e desenvolverase a través do Grupo de Desenvolvemento Rural Sil-Bibei-Navea, contando con financiamento do FEADER dentro do PEPAC 2023-2027.
A iniciativa busca achegar á veciñanza técnicas relacionadas coa elaboración artesanal de pomadas e bálsamos mediante o aproveitamento das plantas presentes na contorna natural.