O Festival do Paradiso celebra a súa XI edición este sábado no Ateneo Casino de Monforte
A Asociación Cultural Náufragos do Paradiso organiza este sábado, 23 de marzo, a XI edición do Festival do Paradiso, que este ano leva por título “O retorno dos poetas afogados”.
O encontro celebrarase no Ateneo Casino e combinará diferentes propostas culturais e musicais ao longo da noite. A programación comezará ás 19.30 horas cun micro aberto, no que diferentes participantes poderán compartir creacións literarias ou artísticas. Ás 21.30 horas está previsto un descanso antes de retomar a actividade ás 22.30 horas coa proxección da curtametraxe “10 Anos de Paradiso”.
A música será protagonista a partir das 22.45 horas co concerto de Ünder & Diego Flâneur, mentres que o peche da xornada chegará ás 00.30 horas coa actuación de Monoulious DOP, encargados de poñer o broche final ao festival.