O Concello de Monforte impulsa unha nova edición do “Conservatorio na rúa” este venres no centro da cidade
O Concello de Monforte celebrará este venres, 12 de xuño, unha nova edición da actividade “Conservatorio na rúa”, organizada a través do Conservatorio Municipal de Música ‘Mestre Ibáñez’, que achegará a música ao espazo público do centro urbano.
A xornada desenvolverase nas rúas peonís Cardeal e Hermida Balado, onde se habilitarán diferentes puntos de interpretación musical ao aire libre. Neles participarán alumnado e profesorado do conservatorio, nunha actividade que se estenderá entre as 19.00 e as 20.30 horas.
O evento forma parte da programación do centro, que este ano celebra o seu 25 aniversario, e busca amosar o traballo formativo que se realiza nas distintas especialidades instrumentais, ao tempo que se promove a música nun formato aberto á cidadanía.
O alcalde de Monforte, José Tomé, anima á veciñanza a achegarse aos concertos e destaca o carácter divulgativo da iniciativa. “Con esta mostra musical pretendemos dar a coñecer a actividade que se realiza no Conservatorio dun xeito distinto ao habitual, máis aberto e público, procurando a formación integral do alumnado e intentando crear ao mesmo tempo un ambiente musical nestas céntricas rúas”.