O Club Atletismo A Gándara logra unha medalla de prata no Campionato de España por Federacións Autonómicas Sub-16
O atletismo monfortino asinou unha destacada actuación esta fin de semana no Campionato de España por Federacións Autonómicas Sub-16 (CESA), celebrado nas pistas de Pereiro de Aguiar. As representantes do Club Atletismo A Gándara, integradas na Selección Galega, tiveron un papel relevante nunha competición de alto nivel.
A mellor nova chegou da man de Sara Pérez Pallín, que conseguiu a medalla de prata nos 600 metros lisos. A atleta completou unha carreira moi traballada desde o punto de vista táctico, o que lle permitiu subir ao segundo chanzo do podio estatal e confirmar a súa progresión na súa categoría.
Nos 1.000 metros lisos, Mencía Álvarez Velasco tamén realizou unha boa actuación nunha final moi esixente, na que acadou a quinta posición. O seu resultado achegou puntos importantes ao equipo galego e reflicte a evolución que está a amosar ao longo da tempada.
Desde o Club Atletismo A Gándara valoran moi positivamente a participación de ambas deportistas, destacando o labor de formación que se está a desenvolver en Monforte de Lemos e a presenza continuada do club nos principais campionatos estatais de categorías de base.
Os resultados obtidos contribúen tamén ao bo papel global da Selección Galega nesta competición, na que o nivel foi especialmente competitivo en todas as probas.