O Círculo Saviñao acollerá este sábado a presentación do novo libro de Fernando Hernández
O Círculo Saviñao acollerá este sábado, 26 de setembro, ás 19.00 horas, a presentación do último libro do escritor Fernando Hernández, titulado “Conmigo muere tu secreto”.
A novela céntrase en Antonio Gómez, un home que, durante o seu confinamento nunha residencia de maiores, decide confesar un segredo que leva pesando sobre a súa conciencia desde 1991. Ese ano, a súa filla Elena comunicoulle o seu compromiso con Marcos, un mozo traumatólogo do Hospital de Santiago de Compostela.
A confesión leva a Antonio a regresar aos acontecementos vividos durante aquel período, que acabou converténdose nun dos episodios máis dolorosos da súa vida e nunha carga que o acompañaría ata os seus últimos días.
Na historia tamén cobra especial importancia unha persoa do pasado de Antonio. Trátase dun antigo coñecido da súa mocidade, descrito na sinopse como un home perigoso ao que o protagonista tivera que enfrontarse a finais dos anos cincuenta, nun episodio que tivo consecuencias dramáticas.
A presentación de “Conmigo muere tu secreto” celebrarase o sábado no Círculo Saviñao, con entrada aberta ás persoas interesadas en coñecer a nova obra de Fernando Hernández.