O CIM Móbil chega á Teixeira para atender, asesorar e acompañar as mulleres do concello
O Centro de Información ás Mulleres (CIM) porá en marcha o seu servizo itinerante, o CIM Móbil, no concello da Teixeira o vindeiro 14 de setembro. A unidade instalarase diante do centro de saúde da localidade e permanecerá operativa de 9:00 horas a 14.00 horas.
Durante esa xornada, o equipo do CIM ofrecerá ás mulleres da contorna un servizo integral de atención, asesoría e acompañamento, enmarcado dentro das políticas de igualdade e de loita contra a violencia de xénero impulsadas de xeito conxunto por distintas administracións.
A iniciativa enmárcase no Pacto de Estado contra a Violencia de Xénero e conta co respaldo do Ministerio de Igualdade, a través da Secretaría de Estado de Igualdade e contra a Violencia de Xénero, así como da Delegación do Goberno contra a Violencia de Xénero e da Xunta de Galicia. A acción desenvólvese, ademais, no contexto da celebración do Xacobeo 2027.
Con este dispositivo móbil, búscase achegar os recursos de información e apoio a mulleres que residen en zonas rurais ou afastadas dos centros de referencia habituais, facilitando así o acceso á orientación e ao acompañamento en materia de igualdade.