O CF Outeiro de Rei e o CF Pavillón triunfan no VII Torneo de Fútbol-8 CF de Monforte
O alcalde de Monforte, José Tomé, xunto co concelleiro de Deportes, José Manuel Mougán, fixo entrega na tarde de onte das medallas e trofeos do VII Torneo de Fútbol-8 CF Monforte, celebrado durante toda a fin de semana no campo municipal Luis Bodegas. No acto tamén participou a presidenta do club, Vanesa Fernández.
Tras a disputa da categoría infantil o sábado, a competición, organizada polo CF Monforte en colaboración co Concello, concluíu este domingo co desenvolvemento simultáneo das categorías prebenxamín, benxamín e alevín en tres campos de xogo.
Na categoría prebenxamín participaron CD Rúa, SD Sarriana, CF Outeiro de Rei, CD Allariz, AD Bosco, CD Monforte B e CF Monforte A. O CF Outeiro de Rei proclamouse campión tras impoñerse ao CF Monforte na final, mentres que o CD Rúa logrou a terceira posición.
Na categoría benxamín tomaron parte SD Sarriana, CD Rúa, CF Outeiro de Rei, Pabellón CF e os equipos CF Monforte A, B e C. O CF Outeiro de Rei volveu situarse no máis alto da clasificación, seguido do CF Monforte, que foi segundo, e do Pabellón CF, terceiro.
Na categoría alevín competiron CD Rúa, SD Sarriana, EDO Blanco Amor, Pabellón CF e os equipos CF Monforte A e B. O Pabellón CF acadou a primeira posición, o CD Rúa foi segundo e o CF Monforte completou o podio na terceira praza.
O torneo puxo así o broche final a unha fin de semana de fútbol base en Monforte, marcada pola participación de numerosos equipos e o bo ambiente deportivo nas instalacións municipais.