O CEIP Rosalía de Castro de Bóveda estrea curso con case medio cento de escolares
O CEIP Rosalía de Castro de Bóveda comezou o novo curso escolar cunha matrícula próxima aos 50 nenos e nenas, unha cifra que confirma a tendencia ao alza que vén rexistrando o centro nos últimos anos. Trátase, de feito, do terceiro curso consecutivo no que o colexio incrementa o seu número de alumnos, un dato que fixo necesario desdobrar unha das clases correspondentes ao ciclo de Educación Infantil, co conseguinte reforzo de persoal docente para atender aos grupos.
Desde o goberno local valorouse positivamente esta evolución, que se atribúe en boa medida ao traballo desenvolvido polo equipo docente do centro ao longo dos últimos cursos. Ademais, púxose en valor o papel das medidas de conciliación impulsadas polo Concello para apoiar ás familias fóra do horario lectivo, entre as que se inclúen o servizo de madrugadores e a ocioteca, pensados para facilitar a organización diaria dos fogares con menores en idade escolar.
Co inicio deste novo curso, a comunidade educativa de Bóveda arrinca unha etapa marcada polo crecemento sostido do alumnado e polo reforzo dos servizos de apoio ás familias.