O CEIP Rosalía de Castro de Bóveda desenvolve actividades de outono e Samaín arredor do consumo responsable
O CEIP Rosalía de Castro de Bóveda mantén en marcha a súa programación de outono e Samaín enmarcada na iniciativa 'Magostín', con diferentes propostas dirixidas ao alumnado do centro.
A semana pasada, o estudantado tomou parte nunha charla e nun obradoiro centrados no consumo responsable e nas normas de etiquetaxe de produtos. Ambas as dúas actividades correron a cargo da Escola Galega do Consumo (EGC), que as desenvolveu dentro do programa 'Con-sumo coidadín no Samaín'.
Pola súa banda, os nenos e nenas de Educación Infantil levaron a cabo a proposta 'Axúdanos a disfrazar a nosa cabaza', na que traballaron de xeito creativo arredor da decoración de cabazas, un dos elementos característicos destas datas.
Deste xeito, o centro educativo combina na súa programación de outono contidos formativos sobre consumo responsable con actividades lúdicas e creativas vinculadas á tradición do Samaín.