O BNG leva ao Parlamento o estado da Ponte do Seixo de Chantada
O BNG levou ao Parlamento de Galiza a situación da Ponte do Seixo de Chantada, despois de detectárense nos últimos días danos nesta construción, considerada a máis antiga do concello. As iniciativas foron presentadas por Iago Suárez, candidato á Alcaldía de Chantada e deputado na Cámara galega.
A Ponte do Seixo, erguida en 1769, é un elemento destacado do patrimonio municipal chantadés. A súa función non é só simbólica, xa que permite o paso por riba do río Asma no tramo en que este divide as parroquias de Brigos e San Xurxo de Asma, polo que tamén cumpre un papel relevante na comunicación viaria entre ambos os dous núcleos.
Polo momento non se coñece con exactitude o momento en que se produciron os danos nin a súa causa. Aínda así, desde o BNG insístese en que a prioridade agora debe ser acometer canto antes os traballos de restauración necesarios para garantir a conservación da ponte.
Suárez destacou que o mantemento desta infraestrutura reviste unha importancia capital e fixo un chamamento á colaboración entre as diferentes administracións implicadas. Neste sentido, pediu que o Concello, a Deputación e a Xunta de Galiza actúen de xeito coordinado e activo para evitar que a estrutura poida chegar a esborrallarse.
Segundo a información coñecida nos últimos días, se finalmente un dos muros superiores chegase a ceder, a rehabilitación posterior sería considerabelmente máis complexa e tamén máis cara. Desde o BNG advírtese de que permitir que isto ocorrese, coñecendo xa o estado actual da construción, resultaría inxustificábel.
O candidato nacionalista sinalou que, até o de agora, a conservación da ponte fora adecuada, pero que a detección de danos de certa consideración esixe agora unha resposta urxente por parte das administracións competentes. Suárez quixo salientar ademais que as consecuencias dun posíbel deterioro maior non afectarían unicamente ao valor histórico e patrimonial da ponte, senón tamén ao tránsito rodado que conecta actualmente as parroquias de Brigos e San Xurxo de Asma.
As iniciativas rexistradas polo deputado nacionalista solicitan, ademais da reparación da estrutura, que a Xunta de Galiza elabore un estudo técnico que permita determinar as posíbeis causas que orixinaron os danos detectados.