O BNG de Quiroga organiza este venres un acto sobre Begoña Caamaño polo Día das Letras Galegas
O BNG de Quiroga volverá sumarse este ano á celebración do Día das Letras Galegas cun acto dedicado á figura de Begoña Caamaño, autora homenaxeada neste 2026.
A actividade levará por título “Begoña Caamaño, a muller que inventaba o mundo” e desenvolverase o vindeiro venres 15 de maio, ás 20.00 horas, no Salón de Actos da Casa da Cultura de Quiroga.
O encontro contará coa participación da escritora e profesora Olga Novo, quen realizará un percorrido pola obra de Caamaño para afondar na reinterpretación dos mitos desde unha perspectiva feminista e tamén na relación da autora coa realidade social galega.
Segundo avanzou a relatora, a intervención abordará figuras da tradición literaria como “A Penélope”, presentes tanto na obra de Begoña Caamaño como na literatura galega, así como outras “Penélopes reais”.
Desde o BNG de Quiroga animan á veciñanza a participar nesta actividade para achegarse á traxectoria da escritora e xornalista viguesa, destacada tanto polo seu labor profesional como pola repercusión das súas obras, especialmente “Circe ou o pracer do Azul” e “Morgana en Esmelle”, títulos polos que recibiu diversos recoñecementos literarios.
A formación nacionalista tamén quixo poñer en valor o activismo social de Begoña Caamaño, subliñando o seu compromiso “como nacionalista, sindicalista, feminista e antimilitarista”.