Medio ambiente

Manuel Luaces lamenta que «tivese que caer unha gran póla sobre unha instalación utilizada pola veciñanza para demostrar que as nosas advertencias estaban fundamentadas»

O BNG de Monforte denuncia a falta de actuación do Goberno municipal ante o estado de numerosas árbores situadas nas marxes do río Cabe, despois de que unha gran póla dun chopo caese esta noite sobre o embarcadoiro do Parque dos Condes e provocase danos na súa estrutura.

A formación nacionalista lembra que xa advertira do risco no pleno municipal do pasado 25 de setembro, cando presentou un rogo para solicitar o saneamento das árbores que estaban a piques de caer ou que xa caeran no paseo do río. Segundo o BNG, o equipo de goberno restou importancia ás advertencias e non adoptou as medidas necesarias para evitar situacións como a acontecida.

Manuel Luaces, concelleiro do BNG en Monforte, lamenta que «tivese que caer unha gran póla sobre unha instalación utilizada pola veciñanza para demostrar que as nosas advertencias estaban fundamentadas». O edil considera especialmente preocupante que o incidente puidese provocar danos persoais e non unicamente materiais.

Luaces critica a actuación do Goberno municipal por non responder ao que cualifica como unha situación de risco evidente. «Advertimos dunha situación de risco evidente e, en lugar de actuar con responsabilidade, o equipo de goberno optou por restarlle importancia. Non se pode gobernar ignorando os problemas que se trasladan desde a oposición, especialmente cando está en xogo a seguridade das persoas», afirma.

Desde o BNG insisten en que non se trata dun caso illado e sinalan que existen outras árbores na contorna do río cuxo estado require unha revisión técnica. A formación nacionalista aclara que non reclama a tala indiscriminada de exemplares, senón o coidado do patrimonio natural mediante as podas e os traballos de mantemento necesarios, así como a intervención naquelas árbores que presenten un risco real.

«Non estamos pedindo que se talen indiscriminadamente as árbores, senón que se coide o noso patrimonio natural, se realicen as podas e os traballos de mantemento necesarios e se actúe sobre aqueles exemplares que presenten un risco real», explica Luaces.

Por este motivo, o BNG reclama ao Goberno municipal unha inspección urxente do arborado das marxes do Cabe, a intervención sobre os exemplares que poidan representar un perigo e a reparación dos danos ocasionados no embarcadoiro do Parque dos Condes.

«Agardamos que desta volta o Goberno municipal tome en serio as advertencias. A seguridade da veciñanza debe estar por riba da soberbia política. Non podemos esperar a que aconteza unha desgraza para actuar», conclúe Manuel Luaces.