Actualidade

O municipio lucense recibe distintas actuacións, entre elas a mellora da accesibilidade na Praza de Abastos, un obradoiro dual de emprego dotado con máis de medio millón de euros e un incremento do orzamento para o Servizo de Axuda no Fogar

O delegado territorial da Xunta en Lugo, Alfonso Villares, reuniuse onte co alcalde de Chantada, Manuel Lorenzo Varela, nun encontro institucional no que repasaron as principais necesidades do municipio e as actuacións que o Goberno galego leva adiante para reforzar os servizos e as dotacións locais.

Entre os investimentos máis recentes destaca a mellora da accesibilidade na Praza de Abastos, que conta cunha achega de 48.100 euros procedente do Fondo de Compensación Ambiental (FCA) non competitivo. A esta súmase o acondicionamento das pistas de tenis do parque Eloísa Rivadulla, para o que a Xunta destinou 36.000 euros con cargo á orde de infraestruturas de uso público.

Tamén se abordou o obradoiro dual de emprego 'Serra do Faro X', que inclúe entre as súas actuacións a pavimentación da praza Concepción Arenal e da rúa do Comercio, o acondicionamento de novas zonas axardinadas e a colaboración na atención sociosanitaria a persoas dependentes no centro de día da Barrela. Este proxecto, compartido cos concellos de Carballedo e Taboada, conta cun orzamento de 544.500 euros procedentes da Consellería de Emprego, Comercio e Emigración.

Durante o encontro repasáronse ademais outras actuacións desenvolvidas nos últimos meses en colaboración co Concello, como a humanización e creación dun parque infantil na praza Luis García Arias, a adecuación da contorna da Igrexa de Santa María de Nogueira, a rehabilitación da casa-escola de Mouricios e a mellora da cuberta e substitución das fiestras no CEIP Xoán do Requeixo, así como a reforma da instalación eléctrica neste centro e no CEIP Eloísa Rivadulla.

No ámbito dos servizos sociais, puxo de manifesto o incremento do orzamento que a Consellería de Política Social e Igualdade destina ao Servizo de Axuda no Fogar, que este ano acada os 748.300 euros no municipio.

Ao encontro asistiu tamén o vicepresidente da Deputación de Lugo, aínda que o eixo central da visita foi o repaso dos investimentos e actuacións desenvolvidas en Chantada.