Monforte suspende o concerto de Beret previsto para as Festas Patronais de 2026
O Concello de Monforte de Lemos decidiu cancelar o concerto de Beret que figuraba no programa musical das Festas Patronais de 2026. A actuación estaba prevista para o vindeiro 15 de agosto.
A decisión prodúcese tras as informacións difundidas nos últimos días sobre o cantante sevillano. Segundo informou o goberno local, a medida manterase mentres non se esclareza a situación legal do artista.
Para materializar a suspensión, o Concello trasladou instrucións á empresa BlacPro Producción & Rental, encargada da organización dos concertos das festas, para que inicie os procedementos administrativos necesarios que permitan deixar sen efecto a actuación programada.
Paralelamente, a administración local solicitou á mesma empresa que comece a analizar a dispoñibilidade doutros artistas co obxectivo de cubrir o oco deixado no cartel musical das celebracións.
O Concello sinala que a decisión sobre o substituto de Beret será comunicada unha vez se pechen as xestións e exista unha proposta definitiva para a actuación do 15 de agosto.