Monforte reivindica o Día do Orgullo colocando unha bandeira co arco da vella na casa consistorial

RibeiraSacraXa
A bandeira permanecerá pendurada ata o luns 1 de xullo, tal e como se veu facendo todos estes anos
Bandeira-LGTBI-Concello-Monforte
Bandeira-LGTBI-Concello-Monforte
24 Xuño 2024

O Concello de Monforte súmase aos actos de celebración do Día Internacional dos dereitos das persoas LGTBI, o Día do Orgullo, que terá lugar o vindeiro venres 28 de xuño en todo o mundo.

Deste xeito, e tal como se veu facendo polo Equipo de Goberno do Concello en pasadas edicións, procedeuse a colocar no balcón da Casa Consistorial a bandeira co arco da vella, símbolo en todo o mundo da comunidade LGTBI para conmemorar o Día Internacional dos dereitos das persoas LGTBI+.

A bandeira permanecerá pendurada ata o luns 1 de xullo, tal e como se veu facendo todos estes anos en que se conmemorou dende o Concello monfortino.

Con este sinxelo xesto, pero cun valor e un significado moi grande, o Concello de Monforte quere representar o seu compromiso pola igualdade, a liberdade e a diversidade e o seu rexeitamento ás discriminacións dirixidas a calquera persoa pola súa condición sexual.

A través desta iniciativa, o alcalde, José Tomé Roca, manifestou, en nome de todos os veciños e veciñas de Monforte “o noso apoio institucional e social a esta celebración do Día do Orgullo LGTBI+, co obxectivo de facer visible á nosa sociedade a diversidade sexual, á vez que promovemos a igualdade, liberdade e o respecto de todas as persoas. Dende o Concello de Monforte condenamos a discriminación ou calquera outra forma de violencia, tanto física como verbal, e exercida contra calquera persoa ou colectivo, ben sexa por razóns de orientación ou identidade sexual ou ben sexa por calquera outro motivo que supoña un ataque ós dereitos fundamentais e liberdades das persoas”.

Neste senso, o Equipo de Goberno do Concello considera fundamental afondar na educación da cidadanía sobre diversidade sexual, a través de programas de concienciación e sensibilización que acheguen información á veciñanza e de actos simbólicos coma este que vimos de anunciar.

O rexedor rematou sinalando que “dende o Concello de Monforte queremos promover valores de respecto cara a diversidade de orientación sexual e identidade de xénero e contribuír así ao avance na consecución dos dereitos, a visibilidade e a normalización da vida de todo o colectivo LGTBI”.

0.18908500671387