Monforte mantén 73 prazas libres nas Escolas Deportivas Municipais
O Concello de Monforte mantén dispoñibles 73 prazas nas Escolas Deportivas Municipais para o curso 2026-2027, unha vez rematado o período ordinario de inscrición. En total, o programa municipal ofertou 283 prazas, das que 30 corresponden ás actividades para persoas adultas e 43 ás destinadas a nenos e nenas.
Entre as modalidades infantís que aínda dispoñen de prazas figuran pádel, golf, kung fu e zumba infantil. No caso das actividades para adultos, quedan vacantes en ximnasia de mantemento, tai chi, ioga e zumba.
As prazas dispoñibles poden solicitarse directamente na Oficina Municipal de Deportes. No caso de ximnasia de mantemento, quedan sete prazas no grupo dos martes e xoves de 10.30 a 11.30 horas, seis nos luns e mércores de 17.00 a 18.00 e tres nos martes e xoves no mesmo horario. Tai chi dispón de cinco prazas, ioga doutras cinco e zumba para adultos de catro.
Nas actividades infantís quedan dez prazas en pádel, catro en golf, dez en kung fu e 19 en zumba infantil. Para máis información, o Concello facilita o teléfono 982 875 430 e o correo deportes@concellodemonforte.com.
As actividades das Escolas Deportivas Municipais comezarán en outubro e desenvolveranse ata finais de maio de 2027, cun total de oito meses lectivos. O prezo é de 92,70 euros por persoa e modalidade para todo o curso, cunha bonificación do 50% para os integrantes de familias numerosas.
Para participar é necesario ter entre 6 e 15 anos nas escolas infantís ou 16 anos ou máis nas de adultos, estar empadroado ou empadroada en Monforte e cumprir as condicións establecidas para cada actividade. A matrícula require o modelo de solicitude correspondente, unha copia do DNI e, no caso dos menores, tamén a documentación do pai, nai ou titor ou titora que figure na solicitude.
A programación deportiva municipal complétase cos cursos da Piscina Climatizada Municipal, que conta con 264 prazas distribuídas en 26 grupos. Actualmente hai 194 persoas matriculadas, polo que permanecen 70 prazas dispoñibles.
Os cursos están organizados en tres trimestres e comezarán a principios de outubro. A oferta inclúe grupos para bebés, nenos e nenas de diferentes idades e niveis, adultos en iniciación e perfeccionamento e ximnasia acuática.
As clases desenvolveranse dúas veces por semana, con sesións de 45 minutos. A inscrición nas prazas que permanecen libres pode realizarse directamente na Piscina Municipal, onde tamén se pode solicitar máis información a través do teléfono 982 202 965 ou do correo apinguela@ideasdebolina.com.