Monforte estrea o XII Festival Cómico Festivo 'A Rúa é Vosa' con sete propostas para todos os públicos
As Festas Patronais de Monforte, que se prolongarán ata o vindeiro domingo 16 de agosto, xa contan cunha das súas citas máis agardadas polas familias: o Festival Cómico Festivo 'A Rúa é Vosa', que este mércores celebrou a súa duodécima edición coa actuación de Circo Activo. A compañía presentou na Praza de España, ás 13.00 horas, o seu espectáculo de música e acrobacias 'Mi, sol, si... Xa!', que reuniu a un numeroso público.
A xornada completouse co pasarrúas do Grupo de Gaitas Gaiteiros de Lemos e dos Xigantes e Cabezudos, que percorreron as rúas do centro urbano durante a mañá.
Esta duodécima edición do certame, pensado para o gozo de todas as idades, reúne sete espectáculos a cargo doutras tantas compañías especializadas en disciplinas como o clown, a acrobacia, a maxia, a música, os monicreques e a globoflexia.
O festival desenvolverase os días 12, 13, 14 e 16 de agosto, cun total de trece sesións de acceso gratuíto, tanto en horario de mañá como de tarde, na Praza de España e na rúa Cardeal. A programación non incluirá actividades o día 15, coincidindo coa celebración do Día do Gaiteiro, nin tampouco a tarde deste mércores 12, para que a veciñanza poida seguir sen interferencias a eclipse solar total que será visible desde a localidade.
Programa completo
Mércores 12:
- 13.00 h. Praza de España: Circo Activo
Xoves 13:
- 12.00 h. Rúa Cardeal: Otto il Basotto
13.00 h. Praza de España: Luciérnagas Teatro
19.00 h. Rúa Cardeal: Otto il Basotto
20.00 h. Praza de España: Luciérnagas Teatro
Venres 14:
- 12.00 h. Rúa Cardeal: Jisoo Park
13.00 h. Praza de España: Abraham Arzate
19.00 h. Rúa Cardeal: Jisoo Park
20.00 h. Praza de España: Abraham Arzate
Domingo 16:
- 12.00 h. Rúa Cardeal: Animar-T
13.00 h. Praza de España: Francis Zafrilla
19.00 h. Rúa Cardeal: Animar-T
20.00 h. Praza de España: Francis Zafrilla