Monforte de Lemos presenta o seu programa de actos para o 25-N con obradoiros, teatro e unha performance na Praza do Concello

O Concello de Monforte de Lemos deu a coñecer a programación de actividades que levará a cabo con motivo do 25 de novembro, Día Internacional da Eliminación da Violencia contra a Muller. A campaña, baixo o nome ‘Monforte en negro contra as violencias’, busca implicar ao conxunto da cidadanía, asociacións, colectivos e empresas da localidade no rexeitamento ás distintas formas de violencia machista.
Durante a presentación, responsables municipais sinalaron que a violencia de xénero non debe entenderse como un asunto individual, senón como unha cuestión que compete a toda a sociedade. Incidiuse tamén en que esta violencia non se limita ás agresións físicas, senón que abrangue outras formas de maltrato como o control, as ameazas, o illamento social, o dano psicolóxico ou a violencia sexual.
Acto central o 25 de novembro
O acto principal da conmemoración celebrarase o mércores 25 de novembro, ás 12.00 horas, na Praza do Concello. A xornada comezará coa lectura dun manifesto institucional e continuará coa performance ‘Cadeiras Baleiras’, unha proposta artística e reivindicativa que pretende escenificar o baleiro que deixan as vítimas mortais da violencia machista. Entre os asentos baleiros que formarán parte da posta en escena, incluiranse tres cadeiras en lembranza dos menores falecidos como consecuencia da violencia vicaria.
No acto participará alumnado de Educación Primaria dos centros educativos da cidade, e repartirase material divulgativo baixo o lema da campaña entre os asistentes.
Pancartas, vinilo e tótems informativos
Como parte das accións de difusión, colocaranse pancartas conmemorativas na Casa Consistorial e no Centro Cívico, ademais dun vinilo alusivo á campaña no bus urbano, co fin de convidar á poboación a sumarse á concentración do día 25. Tamén se repartirán carteis e dípticos co programa completo de actividades.
Como novidade deste ano, desde hoxe instalaranse tótems informativos de carácter permanente en diferentes dependencias municipais —a Casa Consistorial, a Biblioteca Municipal e o Complexo Deportivo da Pinguela— co obxectivo de dar a coñecer durante todo o ano os recursos dispoñibles fronte á violencia machista e facilitar que calquera persoa saiba onde acudir en caso de necesitalo.
Obradoiros nos centros educativos
Desde o 9 e ata o 17 de novembro, o alumnado de 6º de Educación Primaria dos centros de Monforte participa no obradoiro ‘Prevención da violencia de xénero no contexto dixital’, centrado en fomentar un uso seguro das tecnoloxías e a igualdade tamén no ámbito dixital.
Paralelamente, entre o 9 e o 24 de novembro desenvólvese o obradoiro ‘Violencia de xénero dixital: aproximación práctica’, dirixido ao alumnado de 3º da ESO, co obxectivo de axudar á mocidade a identificar e afrontar as violencias dixitais e o cibermachismo.
Maxia, defensa persoal e teatro
O domingo 22 de novembro, ás 18.00 horas, a Casa da Cultura acollerá o espectáculo familiar de maxia ‘Igualdade, onde estás?’, a cargo da ilusionista Maga Fani, que combinará maxia, humor e participación do público para transmitir valores de igualdade. A entrada será gratuíta ata completar o aforo.
O xoves 26 de novembro celebrarase no Centro Cívico unha nova edición do Curso de Defensa Persoal Feminina, impartido por Juan José Martínez mediante o chamado ‘Método Mais’. Haberá dúas quendas, unha de mañá (de 09.30 a 13.30 horas) e outra de tarde (de 16.00 a 20.00 horas). A participación é gratuíta, aínda que as prazas son limitadas e cubriranse por orde de inscrición, debendo as interesadas anotarse previamente no Centro de Información á Muller (CIM), a través do teléfono 982 41 63 50.
Ese mesmo xoves 26, ás 20.15 horas, o Edificio Multiusos acollerá a obra de teatro ‘A cámara escura’, da compañía Vórtice Escénico, dentro da programación da Rede de Teatros e Auditorios. Escrita por José Luis Baños de Cos e dirixida por Sara Rey Seoane, a peza, dirixida a público adulto, retrata a situación das vítimas de ciberacoso e a espiral de dor e desprezo á que se ven sometidas.