Monforte de Lemos garda loito pola traxedia ferroviaria de Toledo e cancela a función de teatro deste xoves
O Concello de Monforte de Lemos decidiu sumarse aos tres días de loito oficial decretados polo Goberno de España como sinal de dó e respecto cara ás vítimas do grave accidente ferroviario rexistrado este mércores no municipio toledano de Urda.
Como consecuencia, as bandeiras que ondean na fachada da Casa Consistorial permanecen a media hasta durante este período. Ademais, o consistorio decidiu cancelar a función de teatro que estaba programada para hoxe xoves, ás 20.15 horas, no Edificio Multiusos da localidade. A representación terá lugar o martes 1 de decembro, mantendo o mesmo horario e lugar.
Xa o mércores, a través dun decreto asinado pola Alcaldía, convocouse un acto de homenaxe ás persoas afectadas polo sinistro: ás 20.00 horas gardouse un minuto de silencio diante da sede municipal. Ese mesmo día, o alcalde optou tamén por suspender o resto da súa axenda institucional prevista.
Desde o Equipo de Goberno, e en representación de toda a Corporación Municipal, trasladouse o máis sentido pésame aos familiares e achegados das vítimas, así como unha mensaxe de solidariedade dirixida a todas as persoas que se viron afectadas por este grave accidente.