Monforte de Lemos conmemora o Día Mundial contra o Cancro de Mama cun acto reivindicativo na rúa Cardeal
Monforte de Lemos acolleu esta mañá de luns os actos organizados pola delegación local da Asociación Española Contra o Cancro (AECC) con motivo do Día Mundial contra o Cancro de Mama, que se celebra cada 19 de outubro. A cita, desenvolvida na rúa Cardeal baixo o lema "Tomámolo a peito", contou coa presenza de representantes do Concello, que se sumaron ás 11.00 horas ao acto floral e á lectura do manifesto conmemorativo.
Á convocatoria acudiron, ademais do rexedor municipal, varios concelleiros do equipo de goberno con responsabilidades en áreas como obras e medio rural, deportes, igualdade e consumo, e medio ambiente, xunto a outros membros da corporación.
Durante toda a xornada, voluntarios e representantes da AECC informaron aos veciños sobre o labor da asociación e animaron á poboación a colaborar mediante a compra dunha planta, cuxa recadación se destina á loita contra esta enfermidade.
Esta efeméride ten como obxectivo sensibilizar á sociedade, promover o coñecemento da enfermidade e dar visibilidade a quen a padece. O manifesto lido durante o acto subliña a importancia de afrontar con determinación unha patoloxía que supón un punto de inflexión na vida das mulleres diagnosticadas.
A Torre da Homenaxe, iluminada de rosa
Como mostra de apoio ás persoas afectadas, o Concello de Monforte iluminará esta noite de cor rosa a Torre da Homenaxe do conxunto monumental de San Vicente. Con esta iniciativa preténdese concienciar sobre a relevancia da investigación e a detección precoz deste tipo de tumor, o máis frecuente entre as mulleres.
O Concello mantén ademais unha colaboración estable coa AECC en Monforte, á que cede tres locais municipais desde onde a asociación atende a pacientes e familiares. A corporación tamén participa na organización da Carreira contra o Cancro, que ten lugar cada mes de setembro na localidade.