Monforte de Lemos abre mañá o prazo para solicitar axudas a deportistas federados que compitan a nivel individual
Os deportistas monfortinos que compitan en modalidades individuais teñen dende mañá, mércores 21 de outubro, unha nova oportunidade de optar a unha axuda económica municipal. O Concello porá en marcha o procedemento despois de que este martes se fixese público no Boletín Oficial da Provincia (BOP) de Lugo o resumo das bases que regulan a convocatoria correspondente á tempada 2025-2026. Como o prazo de presentación é de 10 días hábiles a contar dende esa publicación, a data límite para rexistrar as solicitudes será o 3 de novembro.
O obxectivo destas axudas é recoñecer a traxectoria de quen practica deporte de forma individual e logrou resultados destacados en competicións de alto nivel. Para iso, terase en conta a traxectoria de cada solicitante entre o 1 de outubro de 2025 e o 30 de setembro de 2026, período durante o cal deberán ter tomado parte, cando menos, nunha cita de carácter estatal, continental ou mundial dentro da súa especialidade.
Non todas as disciplinas encaixan nesta definición: quedan fóra da convocatoria as probas por equipos, como os relevos, ou calquera competición na que varios membros dun mesmo grupo actúen de maneira conxunta ou sincronizada, xa que o programa está pensado especificamente para o rendemento individual.
En canto á dotación económica, o Concello reservou un total de 10.000 euros para repartir entre os beneficiarios, cun tope de 600 euros por persoa. O rexedor local, José Tomé Roca, quixo poñer en valor esta liña de axudas lembrando que Monforte conta con "unha excepcional canteira de deportistas que destacan en moitas disciplinas e que sitúan a Monforte nun lugar elevado dentro da elite deportiva galega".
Quen pode optar á axuda
Non todos os deportistas federados poderán acceder a esta bolsa, xa que as bases fixan varias condicións que deben cumprirse de forma conxunta. É necesario, en primeiro termo, residir en Monforte de Lemos —con empadroamento vixente polo menos dende o 1 de outubro de 2025— e manter a ficha federativa en vigor cunha federación galega ou española durante todo o período avaliado.
Ademais da participación nunha cita estatal, europea ou mundial xa mencionada, pídese ter competido nun mínimo de tres probas oficiais ao longo da tempada. Os solicitantes, pola súa banda, terán que acreditar que non manteñen débedas pendentes con Facenda, nin estatal nin autonómica, nin coa Seguridade Social nin co propio Concello, e non poderán estar afectados por ningunha causa legal que impida recibir subvencións públicas.
Trámites e documentos necesarios
Quen queira presentarse a esta convocatoria pode descargar o formulario de solicitude dende a web municipal, www.monfortedelemos.es, ou consultalo na Base de Datos Nacional de Subvencións. A entrega pode facerse no Rexistro Xeral do Concello ou en calquera das oficinas habilitadas conforme á normativa estatal sobre procedemento administrativo común.
Xunto ao impreso de solicitude, será necesario achegar o documento de identidade do interesado —ou, se é menor de idade, o do seu pai, nai ou titor legal, ademais do libro de familia—, un certificado bancario a nome do deportista ou do seu representante, e varias declaracións responsables: sobre outras axudas que se puidesen recibir para o mesmo fin, sobre estar ao día coas obrigas fiscais e coa Seguridade Social, e sobre non incorrer en ningunha prohibición legal para ser beneficiario deste tipo de subvencións. Tamén é imprescindible un certificado da federación correspondente que recolla os resultados logrados no período, a vixencia da licenza federativa e, se procede, as convocatorias coa selección galega ou nacional. De non autorizar ao Concello a comprobar de oficio o empadroamento, deberase achegar ademais o certificado correspondente.
Como se valorarán as solicitudes
Á hora de puntuar cada expediente, só se terán en conta os logros conseguidos na disciplina concreta para a que se pide a axuda, sempre que o solicitante conte coa licenza federativa nesa mesma modalidade. O baremo atenderá aos tres mellores resultados acadados en probas oficiais durante o período sinalado, segundo a táboa recollida nas bases, ademais das convocatorias coa selección galega ou a estatal —de ser convocado por ambas as dúas, considerarase a de maior nivel competitivo—. Entenderase por "oficial" toda competición recoñecida como tal pola federación deportiva correspondente ou pola administración con competencias na materia.