Monforte achega ao alumnado a realidade de Palestina a través da obra ‘FOOT’
O Edificio Multiusos de Monforte acollerá este xoves 8 de outubro a representación de ‘FOOT’, unha obra de Pallasos en Rebeldía que emprega o teatro para achegar ao público a realidade de Palestina. A función comezará ás 12.00 horas e contará coa asistencia de arredor de 200 alumnos e profesores de catro centros educativos da cidade.
A actividade está organizada polo Concello de Monforte coa colaboración de Culturactiva e do Fondo Galego de Cooperación. Participarán estudantes dos IES A Pinguela, IES Río Cabe, IES Daviña Rey e do Colexio Ferroviario.
Aínda que a función está especialmente dirixida ao alumnado de Secundaria e Bacharelato, a entrada estará aberta ao público xeral ata completar o aforo.
‘FOOT’ toma como punto de partida a historia dun futbolista palestino que narra o difícil percorrido do seu equipo para intentar clasificarse para a Copa Mundial. A obra combina elementos poéticos, cómicos e surrealistas para abordar cuestións relacionadas coa realidade palestina, entre elas os controis militares, o exilio, a corrupción e a morte.
A peza está baseada en acontecementos reais, foi escrita polo dramaturgo palestino-americano Ismail Khalidi, está dirixida por Iván Prado e conta con Fran Rei como protagonista.
O alcalde de Monforte, José Tomé, destacou o papel que pode desempeñar a cultura á hora de achegar aos máis novos a diferentes realidades sociais e internacionais. “Desde o Equipo de Goberno do Concello queremos que a cultura sexa tamén unha ferramenta para educar en valores, para fomentar a solidariedade e para achegar aos nosos mozos e mozas realidades que, aínda que poidan parecer afastadas, forman parte do mundo no que vivimos”, sinalou.
Tomé engadiu que “é importante que os nosos estudantes teñan a oportunidade de achegarse a estas cuestións desde o teatro, desde unha proposta artística e próxima, que lles permita coñecer, reflexionar e formular as súas propias preguntas”.
A representación intégrase no traballo de Pallasos en Rebeldía, que utiliza o teatro, o clown e as artes circenses como ferramentas de sensibilización, solidariedade internacional e transformación social.