Monforte abre este luns o prazo de matrícula nos Campamentos Deportivos de Verán
O Concello de Monforte abrirá este luns 8 de xuño o prazo de matrícula nas actividades do Programa Deportivo de Verán, unha vez publicadas este venres as listas de persoas admitidas nas distintas modalidades.
O programa inclúe o Campamento Deportivo de Verán, o XX Campus de Fútbol Cidade de Monforte–RC Celta de Vigo, os cursos de tenis e os cursos de natación na Piscina Municipal.
As persoas admitidas deberán formalizar a súa matrícula entre o 8 e o 19 de xuño, achegando o formulario definitivo correspondente e, no caso de menores con discapacidade igual ou superior ao 33 %, un cuestionario de saúde e autonomía persoal para a planificación dos apoios necesarios.
A documentación poderá enviarse por correo electrónico ou presentarse nas Oficinas Municipais de Deportes ou Xuventude, situadas nas Casitas da Compañía. Unha vez completado o trámite, entregarase a carta de pago, que poderá aboarse en entidade bancaria ou a través da pasarela de pagos do Concello.
O Concello lembra ademais que as persoas que non realizaron a preinscrición poderán optar ás prazas que quedaron libres nalgunhas actividades. En total, ofértanse vacantes nas tres quendas do campamento deportivo e nos cursos de tenis.
No caso da natación, os cursos desenvolveranse na Piscina Municipal Climatizada con diferentes quendas quincenais en xullo e agosto para nenos e infantil, así como cursos mensuais para bebés, adultos e ximnasia acuática, con horarios de mañá e tarde e grupos de iniciación e perfeccionamento.
O goberno local subliña que o obxectivo do programa é ofrecer unha ampla oferta deportiva estival adaptada a distintas idades e niveis, combinando actividades de lecer, formación e práctica deportiva durante os meses de verán.