Interior Galego Vivo denuncia as condicións laborais das traballadoras das Casas Niño

RibeiraSacraXa
Interior Galego Vivo denuncia as condicións laborais das traballadoras das Casas Niño nos concellos do rural
interior galego vivo
interior galego vivo
16 feb 2023

Interior Galego Vivo denuncia a situación e condicións laborais das traballadoras das Casas Niño e Casas do Maior e pide que a Xunta teña máis implicación pública na xestión e resolución de continxencias como enfermidades ou permisos laborais, evitando que as persoas perdan dereitos e ingresos.

Así, explica que a titular da Casa Niño de Folgoso do Courel "atopouse con que, por quedar embarazada, vai ver drasticamente diminuídos os seus ingresos para poder afrontar o pago dunha persoa substituta para o servizo".

"Esta situación dáse en máis casos: se es titular dunha Casa Niño e tes calquera enfermidade ou permiso laboral ou calquera continxencia non tes os mesmos dereitos ca calquera traballadora", denuncian.

Segundo comentan, a Casa Niño terá carácter gratuíto para as familias, con atención diúrna de luns a venres, salvo festivos, e cun mes ao ano de vacacións. "Salvo estas excepcións, o proxecto debe manterse en funcionamento ininterrompidamente durante todo o ano, polo que se debe contar cunha ou máis persoas substitutas para a persoa titular no caso de enfermidade ou emerxencia, persoal que debe buscar e pagar a propia titular", argumentan.

Así, o salario que lles queda mensualmente ás persoas titulares de Casas Niño, que son maioritariamente mulleres mozas, "é inferior ao salario mínimo e vese moi minguado se teñen que buscar substitucións".

Desde Interior Galego Vivo afirman que "a Xunta descansa sobre os ombreiros do emprendemento de moitas mulleres do rural o que é un servizo básico" e din que "é o mesmo modelo que sigue a Xunta coas Casas do Maior para non incrementar recursos na atención á Dependencia. A Xunta prefire así crear “falsas autónomas” que dignificar as condicións laborais nos Servizos Públicos", critican.

Por último, conclúen que hai municipios de zonas rurais sen prazas suficientes para 0-3 anos, como Monforte, capital da comarca de Lemos, que non ten escola infantil da Xunta; ou en Chantada, onde hai sempre lista de agarda e só se accedeu a ampliar prazas este ano 2022.

Así, tamén esixen á Xunta que elabore un mapa de necesidades de prazas de atención á infancia de 0-3 anos nos concellos do interior galego para aumentar as prazas públicas naquelas zonas con déficit ata garantir os dereitos da infancia ao acceso gratuíto ao ensino infantil.