Esgos organiza o seu primeiro Mercado Local de Nadal con artesanía e gastronomía
O Concello de Esgos acollerá o vindeiro domingo, 6 de decembro, a primeira edición do seu Mercado Local de Nadal, unha iniciativa pensada para impulsar o comercio de proximidade e dar a coñecer o labor dos comerciantes e artesáns da zona.
A cita desenvolverase no Centro Cultural de Parada Xustel en horario de 10.00 a 14.00 horas, e reunirá postos de artesanía e produtos gastronómicos de carácter local.
Segundo a organización, trátase dunha oportunidade para que veciños e visitantes poidan descubrir elaboracións propias da zona, pensadas tanto para o consumo propio durante as festas coma para quen busque un agasallo diferente nestas datas.
Con esta proposta, o Concello busca dinamizar a actividade comercial do municipio en plena tempada nadalega, ofrecendo un espazo no que o público poida coñecer de primeira man os produtos elaborados por quen traballa en Esgos ao longo do ano.