Entregados os premios da campaña Merca no teu Comercio en Quiroga, Folgoso do Courel e Ribas de Sil
A Praza Rúa Lago de Quiroga acolleu este luns o acto de entrega dos premios correspondentes á campaña de dinamización comercial “Merca no teu comercio”, desenvolvida entre o 15 e o 30 de maio nos concellos de Quiroga, Folgoso do Courel e Ribas de Sil.
A iniciativa premiou a clientela que realizou compras nos establecementos destas localidades durante o período da campaña. En total repartíronse 1.000 euros, distribuídos en 20 tarxetas prepago de 50 euros cada unha, que os gañadores deberán empregar en novos consumos no comercio de proximidade.
A campaña “Merca no teu comercio ten premio” forma parte dun programa de promoción das vendas no ámbito rural impulsado pola Federación de Comercio de Lugo, a Federación Galega de Comercio e a Xunta de Galicia, coa colaboración da Asociación de Empresarios e Comerciantes do Xeoparque Montañas do Courel.
No acto celebrado en Quiroga participaron representantes das entidades organizadoras, entre eles o presidente da Federación Galega de Comercio e da Federación de Comercio de Lugo, José María Seijas, o presidente da Asociación de Empresarios e Comerciantes do Xeoparque Montañas do Courel, Juan Luis Vázquez, e o alcalde de Quiroga, Julio Álvarez.
A campaña ten como obxectivo fomentar o consumo no comercio local e contribuír á dinamización económica dos pequenos municipios, reforzando o papel do tecido comercial de proximidade no rural.