Desvíase o tráfico pesado da estrada LU-651 ao seu paso por Folgoso do Courel por obras
Os traballos de estabilización dun noiro na estrada autonómica LU-651 ao paso polo concello de Folgoso do Courel farán necesario o desvío do tráfico pesado desde este luns día 13 e a ata o vindeiro 24 de febreiro.
A Consellería de infraestruturas e Mobilidade está a desenvolver distintas intervencións de emerxencia para a estabilización de muros e de noiros danados polos últimos temporais en catro puntos quilométricos da estrada autonómica LU-651 ao paso polo concello de Folgoso do Courel, que se corresponden cos quilómetros: 18+100, 28+500, 29+120 e 29+500.
As intervencións, que comezaron este luns día 13 e durarán ata o vindeiro 24 de febreiro, suporán un investimento autonómico de máis de 230.000 euros.
En concreto, empezaron as obras no quilómetro 29+120 no que recentemente se produciu un desprendemento do noiro de terraplén que afectou á plataforma da estrada, causando o estreitamento do carril dereito ao afundirse parte do firme.
As obras consisten na execución dun muro de dique para o sostemento da plataforma, a reposición do firme e dos sistemas de contención da estrada. A duración desta intervención estímase en dúas semanas, desde este luns e ata o vindeiro 24 de febreiro.
Deste xeito, durante o tempo de execución dos traballos estará habilitado o un desvío para o tráfico pesado, mentres que para o resto de vehículos facilitarase o paso alternativo.
A Xunta ten tamén pechada a planificación das actuacións do resto de puntos da estrada LU- 651 afectados polo temporal dos pasados meses, tendo previsto iniciar ao remate desta primeira intervención, as obras de estabilización no punto quilométrico 28+500.
Neste caso os traballos consistirán na execución dun muro de dique, para o que tamén será necesario outro corte de estrada durante a intervención.