Cris de Caldas presenta ‘Mulleres de conto’ na Pobra do Brollón
A Casa da Cultura Olga Novo da Pobra do Brollón acollerá o vindeiro sábado 17 de outubro unha sesión de ‘Mulleres de conto’, a cargo de Cris de Caldas, unha proposta que recupera historias de vida e relatos da tradición oral e literaria protagonizados por mulleres.
A actividade busca dar voz a mulleres que, malia non teren vidas de conto, protagonizaron experiencias que merecen ser coñecidas e lembradas. A través de historias de vida e contos, Cris de Caldas achegará ao público as vivencias de mulleres anónimas que tiveron que superar dificultades e obstáculos ao longo da súa vida.
A proposta pretende rescatar esas historias que quedaron en segundo plano e contribuír a manter viva a memoria das súas protagonistas, convertendo a narración oral nunha forma de recoñecemento.
A sesión forma parte do programa ‘Ler conta moito’, impulsado pola Xunta de Galicia para promover a lectura e a narración oral.