Canaval celebra tres días de festas con música e verbena
A parroquia de Canaval, en Sober, celebra esta fin de semana as súas festas, con tres días de actividades que combinarán actos relixiosos, propostas gastronómicas e música para todos os públicos. A programación desenvolverase desde este venres, 9 de outubro, ata o domingo 11.
A primeira xornada comezará o venres cunha pancetada a partir das 21.00 horas. A música chegará coa verbena, na que actuarán a orquestra Alianza e un dúo.
O sábado, 10 de outubro, haberá misa solemne ás 13.00 horas, seguida da sesión vermú co Grupo La Bamba. Esta mesma formación volverá actuar pola noite na verbena, compartindo escenario co grupo A Roda. A xornada incluirá tamén un multisorteo das rifas.
As celebracións rematarán o domingo, 11 de outubro, cunha misa solemne ás 13.15 horas acompañada pola Banda de Sober. Despois, o Dúo Kopérnico animará a sesión vermú e regresará pola noite para a verbena, prevista a partir das 20.00 horas.