Bóveda celebra este martes unha das súas citas máis agardadas do ano: a XXII Feira Outrora de Rubián
Bóveda acollerá este martes unha nova edición da Feira Outrora de Rubián, que alcanza este ano a súa vixésimo segunda edición. A programación desenvolverase ao longo de toda a xornada e estará centrada na artesanía, a cultura tradicional e as actividades para todos os públicos.
A feira abrirá ás 10:00 horas coa apertura dos postos e das mostras de artesanía. Quince minutos despois, ás 10:15 horas, celebrarase unha exhibición de escultura con motoserra.
Ás 11:00 horas abrirán ao público os obradoiros do Centro de Artesanía e Deseño. Á mesma hora, o Grupo de Gaitas do Concello de Bóveda percorrerá o recinto feiral cun pasarrúas.
O programa continuará ás 12:00 horas cunha degustación de produtos galegos baixo a marca “Experiencias de calidade diferenciada”, organizada coa colaboración da Axencia Galega da Calidade Alimentaria (AGACAL). Paralelamente dará comezo o concerto da Banda de Música Sons e Soños.
As actividades retomaranse pola tarde, a partir das 16:00 horas, con demostracións participativas nos distintos postos de artesanía e novos obradoiros do Centro de Artesanía e Deseño.
Ás 17:30 horas celebrarase unha festa infantil acuática, tras a que se ofrecerá unha merenda aos nenos e nenas participantes. A música volverá ser protagonista ás 19:30 horas co concerto da Coral Municipal de Bóveda na capela.
Xa pola noite, ás 20:30 horas, terá lugar unha das citas máis emblemáticas da feira: a recreación etnográfica da malla. A continuación, ás 21:30 horas, ofrecerase o tradicional isco no guizo. A programación da XXII Feira Outrora de Rubián rematará co espectáculo “Verbena inesquecible”, protagonizado por Antonio Barros.