Arranca na Pobra do Brollón o programa de visitas guiadas de verán
![cova-das-choias-brollon](https://ribeirasacraxa.com/wp-content/uploads/2024/07/cova-das-choias-brollon.jpg)
Arrancou o programa de visitas guiadas de verán do Concello da Pobra do Brollón. Baixo o lema Déixate Guiar ofértanse ata o 31 de agosto cinco visitas para coñecer o patrimonio natural, cultural e arqueolóxico do municipio.
As visitas vinculadas á arqueoloxía son o Castro de San Lourenzo de Cereixa, Penas do Castelo en Salcedo, e mais Entre Pataos e Os Conventos, na ribeira de Vilachá de Salvadur. Estas visitas divulgan as pescudas realizadas no marco dos seus respectivos proxectos de arqueoloxía en comunidade, incorporando datos e historias recollidos dos veciños.
![](https://ribeirasacraxa.com/wp-content/uploads/2024/07/programa-visitas-guiadas-pobra-de-brollon.jpg)
A visita Entre Pataos e Os Conventos compleméntase moi ben coa das adegas medievais de Vilachá, onde os visitantes poden coñecer o lugar e catar algún dos viños locais, incluídas na D.O. Ribeira Sacra.
Por último, a visita a Cova das Choias en Óutara permite coñecer o musgo luminescente, as colonias de morcegos e máis os seres mitolóxicos que habitan o lugar. Trátase dunha visita de acceso limitado para protexer a flora e fauna da cova, polo que se permite un máximo de dez persoas por visita e unicamente dúas visitas á semana (martes e xoves).
O resto de visitas son baixo demanda de martes a sábado. Son gratuítas excepto a visita ás adegas de Vilachá que ten un custe de 3 euros para a cata de viño.
A reserva é obrigatoria para todas as visitas no teléfono 622952078, preferentemente por WhatsApp. Para máis información, as persoas interesadas poden contactar nese teléfono ou consultar a páxina web do Concello da Pobra do Brollón (www.concellodapobradobrollon.gal).