AgroMuralla organiza unha comida de confraternidade para afectados polos incendios de 2025 e persoas colaboradoras
A Asociación Agrogandeira AgroMuralla celebrará o vindeiro 16 de xullo unha comida de confraternidade en recoñecemento ás persoas afectadas polos incendios do verán de 2025, así como a todas aquelas que colaboraron nas tarefas de axuda e apoio tras os lumes.
O encontro terá lugar ás 14.00 horas no restaurante La Viuda, na localidade ourensá da Pobra de Trives, e pretende converterse nun espazo de convivencia e agradecemento entre afectados, doantes, transportistas e outras persoas que participaron de maneira solidaria durante os momentos máis complicados derivados dos incendios.
Desde a organización destacan que a iniciativa busca reforzar os lazos creados durante aquela situación de emerxencia e poñer en valor o esforzo colectivo realizado por particulares, entidades e administracións para atender as necesidades das explotacións gandeiras e das familias prexudicadas.
Para asistir era preciso formalizar a inscrición previa, indicando o número de asistentes e a condición de doante, donatario ou colaborador. A convocatoria conta ademais coa colaboración de varios concellos da zona, entre eles Chandrexa de Queixa, A Mezquita, Manzaneda, San Xoán de Río e Maceda.
Con esta xornada, AgroMuralla pretende render homenaxe á solidariedade demostrada durante os incendios e favorecer un encontro entre todas as persoas que contribuíron, dun ou doutro xeito, a superar as consecuencias dunha das campañas de lumes máis difíciles rexistradas nos últimos anos en distintos puntos de Galicia.