Acción Contra a Fame impulsa unha enquisa para coñecer as inquietudes da mocidade do sur de Lugo
A Fundación Acción Contra a Fame está a desenvolver o proxecto 'Comunidades de dinamización e emprego inclusivo: novas ruralidades', unha iniciativa coa que pretende coñecer os intereses, preocupacións e expectativas de futuro da mocidade que reside no sur da provincia de Lugo.
Así, a iniciativa está especialmente orientada á mocidade dos concellos de Sarria, Monforte de Lemos, Taboada, Chantada, Carballedo, O Saviñao, Bóveda, Pantón, Sober, A Pobra do Brollón, Folgoso do Courel, Quiroga e Ribas de Sil.
A través desta acción, a entidade diríxese a rapaces e rapazas de entre 15 e 29 anos co obxectivo de escoitar as súas opinións e contribuír á mellora das oportunidades de emprego e das perspectivas de futuro no rural lucense.
Segundo explican desde a Fundación, a enquisa pretende recoller información sobre a percepción que a xuventude ten do seu lugar de residencia, as súas preferencias formativas, onde cren que vivirán no futuro ou a que lles gustaría dedicarse profesionalmente.
Desde Acción Contra a Fame destacan a importancia de contar coa participación da xuventude para poder deseñar iniciativas adaptadas ás necesidades reais da poboación nova no rural.