Abren as inscricións para unha nova edición da Bike Marathon, que volverá percorrer o Courel o 19 de setembro
Xa está aberto o prazo de inscricións para a Quiroga Bike Marathon 2026, unha das probas de MTB de referencia no sur da provincia de Lugo que celebrará a súa nova edición o próximo 19 de setembro de 2026.
A competición volverá reunir centos de participantes procedentes da comarca da Ribeira Sacra, da comarca de Sarria, doutras zonas da provincia de Lugo e tamén de distintos puntos de Galicia e do exterior, consolidándose como unha cita destacada para os amantes do ciclismo de montaña.
O evento desenvolverase no entorno do Xeoparque Montañas do Courel, un espazo natural de gran valor paisaxístico no que os corredores poderán gozar dun percorrido deseñado para vivir o MTB en estado puro, combinando deporte, natureza e tramos técnicos.
A organización propón dúas modalidades adaptadas a diferentes niveis de experiencia e preparación física. Por unha banda, a Bike Marathon, cun percorrido de 45 quilómetros e 1300 metros de desnivel positivo, e por outra a Bike Extreme, de 65 quilómetros e 2300 metros de desnivel positivo. Ambos os trazados atravesarán sendeiros e paisaxes representativas do Concello de Quiroga, con descensos, zonas rápidas e tramos máis esixentes.
A proba poderá disputarse de forma individual ou por parellas e non será necesaria licenza federativa para participar. Ademais, a inscrición incluirá servizos como bolsa do corredor, seguro deportivo e cronometraxe con chip.
Con esta nova edición, Quiroga consolídase novamente como un dos escenarios máis destacados do MTB galego, acollendo unha xornada deportiva nun contorno natural de alto valor ambiental e paisaxístico.