A Teixeira pecha os Seráns Culturais cunha sesión de cine e música en directo
A Teixeira porá este fin de semana o punto final aos Seráns Culturais desta edición cunha sesión de cine ao aire libre e unha actuación musical, dúas propostas gratuítas para desfrutar en compañía.
A programación comezará o venres coa proxección de “Rondallas” na Praza do Cardenal Quiroga, ás 22.15 horas. A película combina ilusión, música e a historia dunha vila que loita por manter vivo aquilo que a fai especial.
A sesión permitirá gozar do cine ao aire libre e compartir unha noite de verán na Praza do Cardenal Quiroga.
O domingo, os Seráns Culturais despediranse cunha actuación en directo da Banda da Lira, que será a encargada de poñer música á última actividade desta edición.
Os Seráns Culturais da Teixeira comezaron o pasado 10 de xullo e, ao longo destas semanas, ofreceron un total de seis actividades de lecer gratuítas dirixidas á veciñanza para desfrutar do verán.