A segunda edición da “Noite de Estrelas” volverá unir deporte e solidariedade este verán en Quiroga
As Festas de Verán de Quiroga 2026 volverán contar coa celebración da “Noite de Estrelas”, unha andaina nocturna solidaria organizada en colaboración coa Asociación Española Contra o Cancro que alcanza este ano a súa segunda edición tras a boa acollida da primeira convocatoria, na que participaron arredor de 350 persoas.
A actividade mantén o formato de andaina nocturna inspirado na Night Trail e na Night Run, aínda que nesta edición estará centrada unicamente na modalidade de sendeirismo. Como principal novidade, os participantes poderán escoller entre dous percorridos diferentes, un de 4 quilómetros e outro de 8.
A saída terá lugar na Praza Rúa Lago. Desde alí, os participantes dirixiranse cara ao Paseo Fluvial. No caso da ruta curta, o regreso á meta realizarase desde a ponte de Villaverde, mentres que quen opte polo percorrido de 8 quilómetros continuará o itinerario ata Ribeira de Abaixo e San Xulián de Arriba e de Abaixo antes de regresar ao punto de chegada.
Toda a recadación obtida coa celebración da proba será destinada á Asociación Española Contra o Cancro.
A inscrición terá un custo de 5 euros para as persoas adultas e de 3 euros para os menores de 16 anos, e poderán realizarse ata o 5 de agosto na recepción do Concello de Quiroga, en horario de 9.00 a 14.00 horas. Ademais, as persoas interesadas tamén poderán anotarse o mesmo día da proba, entre as 21.00 e as 22.00 horas, na Praza Rúa Lago, diante da Botica.